Sie sind hier:   Karl IV., Chorherren, Verpfändung > Verpfändungen Ingelheims  > Verpfändungsurkunde Schaab-Lenz

Die Verpfändungsurkunde Ingelheims vom 12. Februar 1375 nach Schaab/Lenz


Autor: Hartmut Geißler

Fassung bei Schaab/Lenz, Ausgewählte Urkunden, S. 109-110

"[1] Wir Karl von gots gnaden Römischer keyser, zu allen zeyten merer des Riches und kunig zu Beheim bekennen und dun kunt offenlich mit disem brieve allen den, die yn sehent oder hörent lesen, daz wir umb getruwen annemen nucze dinst, den der hochgeborn Rupreht der elter, pfalczgrave by Ryne, des Heyligen Römischen Riches oberster druchseße und herczog yn Beyern, unser lyeber swager und furste, uns und dem Heyligen Riche dicke nuczelichen geton hat und noch dün sal und mag in kunftigen ziten, demselben herczogen Rupr[ehten], unserm swager, ingeben und befolhen haben Oppenh[eim] und Odernheim, borge und stete, Swabesberg die burg, Nerstein, Ingelnh[eim] und Ingeln[heim], Winterheim und ander dorfer, die dazu gehörent mit allen nuczen, zöllen und zugeherunge, als es vormals die erczbisschaffe und stift zu Mencz ingehabt haben und als die borger und die stat zu Mentze und Heintze zum Jungen, scholtheiße zu Oppenh[eim], ingehabt hant und yczunt inhabent und darzuo Lutern die stad mit allem dem, daz darzuo gehoret, also daz der obgenant hertzog Rupr[eht], unser swager, sine lebetage und nach syme tode herczog Ruprehten der jungste, hertzogen Adolffs seligen sins bruder enkeln, auch als lange er gelebet, by den obgen[anten] sloßen, herscheften, landen, nutzen, zollen und allen zugehorungen verliben sollen und die innehaben und nießen und alle ampte set­zen und entseczen ane alle hindernuß und wyderrede unser und unser nachkommen an dem Riche Romischer k[eys]er und kunige.

[2] Und sal der obg[enant] herczog Rupreht der elter und herczog Ruprehte der jungste uns und unsern nachkomen an dem Riche mit den obgen[anten] sloßen und landen gehorsam sin zu warten und zu dyenen zu unserm und des Riches sachen und noten ane alle argelist und geverde. Und gebieten und heißen vesticlichen by unsern und des Riches holden den borgmannen und borgern zu Oppenheim und in den andern sloßen und landen obgen[ant] und allen amptluden und zollern daselbes, daz sy den obgen[anten] herczog Rupr[ehten] dem eltern und herczog Rupr[ehten] dem jungsten globen und sweren sollen, gehorsam zu sin und zu warten an uns und des Riches stad, als lange sye beyde gelobent in der maß als vorgeschriben stet.

[3] Mit urkund diz brieves versigelt mit unser keyserliches majestad inges[igel], geben zu Prage nach Crists geburte druzenhenhundert jar darnach in dem fonffund­sybenzigestem jar an dem montag vor sante Valentins tag, unser riche in dem nunundzweinzigstem und des keysertums in dem zcweinzigstem jare."

 

Gs, erstmals 05.11.08; Stand: 05.02.17